رحمة ربنا مَش مجرد كلمة بتتقال ابدا ده ممكن يكون شخص بتشوفه ماشي علي الارض رحمة ربنا وكرمه بتكون اتجسدت فيه عشان تديك حكمه او عظه .
انا اتكلمت ياما ومن زمان وبالتفصيل والواقع القصصي عن قوة ومعاناة السيدات عشان تبقي ام وده من اول نشأة الفيس البوك وبعد كده الاف من الأشخاص والبوستات علي مدار السنين تبنت نفس النهج لدرجه ان اصبح ان الكلام في الموضوع ده امر اصبح ماسخ
.
بس مدام سالي امر مختلف تماما
.
مثال لحاجات كتير مختلفه وسواء تاخد منها عظه او تتأمل في اللي مرت بيه او عاشته او متتاملش بس انا واثق انك هاتفهم حاجات كتير وهتاخد بالك من حاجات ممكن تغير حياتك . هيه مش مواعظ لان السوشيال ميديا كلها بقت مواعظ …… ابدا . دي حاجه مهمه للجميع اشعر اني عندي واجب انساني اني أبلغها .
لما تكون في عز شبابك وربنا مديك حاجات كتير حلوه وتبقي تحت كل الضغوط وتتشخص بمرض سخيف فكلنا هذا الانسان وكل واحد ياما مخبي وساكت من المرض اللي ربنا ابتلاه بيه وعايش المحنه وهو ساكت وبيحاول يصرف اموره . وزي اي انسان سالي عانت من الم مزمن وأكياس علي البطانه المهاجره لسنين . اتفتحت بطنها لمجرد اكياس شيكولاتيه الامر اللي أتنبح صوتي وأتوسل للجميع دائما ان يوصلوا الرساله دي ( فتح بطن مع بطانه مهاجره لا ) . حدث تجبس شديد في الحوض . حاولت تعمل منظار ولكن لم يستطيع ان يفعل شيئا .
تضررت الانابيب وازدات الآلام وأصبح مخزون المبيض أربعة بالمائه . والله العظيم وأقسم بالله اربعة بالمائة مش من عشرة وتم اعادة التحليل مرات عديدة وفي معامل مختلفه .
مكنتش عارف اقولها ايه اول مرة جاتلي وكانت تيجي من دولة عربيه وسط كل ضغوط عملها وشغلها عشان اللي بيحركها حاجه اكبر منها ومن اي شخص وهي كلمة ام بالرغم من كم الآلام المصاحبهً لمرضها .
اي طبيب هايشوف واحدة مخزون مبيضها بهذا الضعف اكيد ها يسيب الملف ده واكيد ها يقول للسيدة مافيش امل . وهو مش غلطان لو عمل كده . بس النهاردة انا بسأل نفسي السؤال ده لو كنت قلتلها امشي مافيش امل كان ايه الموقف دلوقتي .
مرضي ضعف التبويض بالملايين زي بالظبط نقص السائل المنوي عند الرجال بالملايين ومحدش عارف ولا سامع وممكن جدا تكون بتتكلم يوميا مع راجل يبدو سعيد ومن جواه بيتقطع من الالم لقلة السائل المنوي عنده او انعدامه وتلاقيه بيتجوز ويطلق او رافض مبدأ الجواز والناس كلها عماله تضغط عليه . والسيدات اللي بتعاني من ضعف التبويض وقلة مخزون المبيض بتلجأ لكل حاجه أعشاب ومقابر وتقع ضحية لدجالين الخلايا الجذعيه .
سالي كانت اقوي من الجميع ووضعت كل ثقتها فيا ودي بتبقي اسؤا شيء في الوجود . لان كم المسؤليه والضغط فوق اي وصف .
في عملية منظار ٣ ساعات باذن المولي فكينا طلاسم البطن واستئصال الاكياس وفك الالتصاقات واستئصال الانبوبه الملتهبة الملتصقه بالأمعاء .
الفديو في اول كومنت
ووانا خارج بالمنظار كنت بكلم ربنا في سري وبسأل هو معقول يارب الحوض ده يشوف حمل . كنت بتصور معاها بعد العمليه وبضحك بس من جوايا عارف بمدي الصعوبة وانكسار نفسها ونفسي لو فشلنا .
سعادتي كانت وانا بشوفها الالم بيروح وكلها تفاؤل باللي جاي والدنيا ايه غير انك تكمل تفاؤل وتسعي في عز المحن .
سافرت ورجعت تاني عشان نبدأ الحقن وبدأنا في علاج تحضيري لشهور قبل الحقن . طلعت بويضه واحده فقط عملت جنين واحد فقط وكنت قولتلها انه حتي لو اتخصب لو مش عاجبني او جنين درجه تانيه فا مش هانقله . مش هانقل الا الجنين اللي مقتنع بيه .
ويشاء ربنا ان الجنين الواحد ده يبقي سوبر وعلي درجة عاليه من الجوده وانه يتنقل وتحمل وعلمتني الحياه اني مفرحش لانه ممكن ينزل في اي وقت .
هيه كانت جايه تشوفه علي السونار مش مصدقه ولا انا . شوفنا الجنين وقلبه بينبض علي السونار وانا في قشعريرة كده وكان فراش بيتحرك في صدري معرفش هيه شعورها ايه بس بردو كتمت فرحتي .
تابعنا معاها الحمل وسافرت لشغلها لان مافيش حاجه في الدنيا ممكن ترحمك كل حاجه لازم تمشي وتكمل حتي لو في احلك وأصعب وقت في حياتك .
ولدت في التاسع القمر ده اللي بدعي ربنا يحرسه ويجعله احسن الناس وتبارك الله الخالق الرحيم
سالي هيه مثال لينا كلنا لكنها ممكن تكون اقوي مننا من فرضية الصفر وانعدام الأمل آمنت ان ربنا ها يديها مسكتتش . نظمت حياتها وسعت . كتير ممكن يعملوا كده ويفشلوا لان رحمة ربنا لما بتنزل علي عبد ليها معاد .
الدروس المستفادهً
١ اول طبيب يمد أيده علي مريضة بطانة مهاجره هو اهم طبيب لانه ممكن يخلي حياتها جحيم او يخلي حياتها جنه . ومش هاتعرف الجنه الا لو شفت الجحيم
٢ اول طبيب يتعامل مع المريض في اي مرض او تدخل جراحي عليه دور كبير جدا
٣ تخريم اكياس لا
٤ كي اكياس لا
٥ استئصال الكيس بجداره نعم
٦ حقن مجهري علي اكياس شيكولاتيه كبيره لا . لان نسب النجاح بتقل وخلايا الجنين عددها بيقل
٧ الشغلانه دي علمتني انك عمرك ما تقول لواحده انك مش هتخلفي حتي لو كل الشواهد بتقول كده لان ياما ناس قالت لناس مش هتخلفوا وخلفوا وياما ناس فشل حقنها المجهري في أوروبا وامريكا وحملوا في مصر او اي دوله تانيه عادي جدا جدا . وياما اطباء ما وثقوش انهم يعملوا منظار في مصر ولا حتي وثقوا في مساعدينهم انهم يعملولهم عمليه وراحوا يعملوها في أوروبا ورجعوا بعك وبلاوي.. وأطباء زوجاتهم ولدوا في امريكا ورجعوا بنواصير واعاقه في الحوض.
٧ في مرض انت قرفان منه دلوقتي وعندك يأس وقرفان صدقني انت مش عارف هتتعالج منه امتي وفين ومع مين وها ينجح ولا لا كلها امور مستنيه الامر الالهي في توقيت معين عشان يبقي كن فيكون ولحد ما ده يحصل اطلب من ربنا اسعي وأثبت وقاوم الاكتئاب هاتتدبر وتتحل من عنده وحده باذن الله .
٨ اللي بتطلع بويضه واحده ممكن تحمل عادي جدا واللي بتطلع ٣٠ وستين ممكن متحملش عادي جدا جدا . زي اللي قلب الجنين بتاعها يبقي فيه عيب خلقي ويعيش عادي جدا ويلعب كره قدم في الآرسنال في انجلترا واللي ابنها يتولد سليم ميكملش عشان دور التهاب رئوي حاد عادي جدا جدا .
وزي اللي تجيب ولد بعد ست بنات ويشاء رب العالمين لم يدخل الجامعه يتوفي.
انت مش عارف انت رايح فين ومنين وازاي امتي بس وسط كل التوهه دي أتمسك بكل حاجه حلوه وحاول ومتقفش لان في حته هتوصلها هتبقي حلوه ومافيش حاجه عظيمه ومكتمله ومافيش حاجه بترضي كل الناس واللي ينفعك ما ينفعش غيرك بس في حاجه حلوه موجودة هتجيلك في وقت ترفع عنك فيه كل الهموم عشان تخش في هموم تانيه ونعيش في كبد عشان الحياه كده . فنسأل ربنا ونطلب منه الرضا والبركة والصحه .
#قولوا_يارب
