انا بشكر رب العالمين ان لسه في ناس عندها ضمير وان في ناس قلبها لسه مماتش وان معندهاش غرور علمي او عدم معرفه عن قصد او عن غير علم .
الناس دي اهم من اي حد .
الطفل الجميل ده والدته ست مصريه اصيله اسمها ميرنا اتشخصت في اول حملها في مستشفي محترمه في دولة الكويت اسمها دار البراء في الجابرية بان الجنين به ميه علي الرئة والميه دي ماليه حجم رئة كامله وضاغطة علي القلب في الشهر الخامس من الحمل وان فرص الجنين في الحياه تكاد تكون منعدمه لو استمر الامر بهذا الشكل .
الست دخلت في صدمه ولقت الدنيا بتضيق في وشها وبدأت تاخد اكتر من رأي والاغلبيه كانت بتأكدلها ان لازم الجنين يجهض لانه مش ها يعيش .
الام تمسكت بالجنين و اشار عليها عدد قليل من الاطباء ان في دكتور في مصر ممكن ربنا يجعله سبب لاننا شوفنا انه بيعمل عمليات واجراءات للجنين داخل الرحم .
في الفترة دي ناس كتير حذروها اوعي تعملي كده الجنين ها يموت وانت ها يحصلك مضاعفات و عمليات الجنين دي الاجنه بتموت والأم بتحصلها مشاكل .
لكن نوع الامهات دي بتبقي اقوي من اي حد وعشان كده ربنا بيكرمهم . فا بردو قررت تنزل مصر فورا من الكويت .
لما قعدت معاها وهيه جايه بكمية المعلومات الخاطئة دي وخصوصا من اطباء زملاء الواحد بيبقي مش عارف يقول للمريض ايه خصوصا من كمية الرعب اللي بيبقي فيه وعنده حق ما هو اما يشوف دكتور كبير سننا ومش واحد بس لا اكتر من واحد بيقولها ان الجنين ها يموت وان اي عمليات تتعمله تبقي هجص وكلام فارغ ( حرفيا بيقولوا كده للمرضي ) المريض هنا بيخاف .
بس تاني مش النوع ده من الامهات واتذكر ان اجرينا ورم في جنين داخل الرحم لبنت طبيب محترم وكان حاضر معانا الجراحه وشكرنا بشدة كان بيقولي انت ماتتصورش كم الاطباء الزملاء اللي قالولي بلاش تعمل العمليه لكن انا وبنتي اخدنا القرار عشان عرفنا واتاكدنا ان الورم اللي في الجنين بيسحب دم كتير منها وعامل لبنتي انيميا وعاوزين بالليزر توقف نمو الورم واخدت رأي استاذ بثق فيه في اسكندريه وقالي اعملها والحمد لله قد كان واوقفنا نمو الورم عن طريق كي الاوعيه المغذيه للورم .
نرجع لميرنا … ميرنا لما دخلت العيادة قولتلها والله العظيم باذن الله ها نعمل الاجراء ونسحب الميه دي من غير ما قلب الجنين يتلمس او يتأثر وباذن الله ها تروحي في نفس اليوم . وباذن الله نسبة النجاح ٥٠ بالميه ذي عمليات الحقن المجهري . وفضلت مش مصدقه لحد ما قمنا بالاجراء بفضل الله وكرمه وخرجت بسلام وفضلت تتابع ومش مصدقة .
ورجعت الكويت وكل ما تحكي لحد او تحكي لدكتور مش مصدق بردو الا طبعا الاطباء المحترمين اللي وجهوها لعمل الاجراء من البدايه وولدت الحمد الله في مستشفي اسمها العدنان في دولة الكويت .
فضلنا نتابع نمو الرئه وقت الحمل وبعد الولادة الحمد لله الرئة اتمددت تماما علي مدار الحمل وتابعنا معها بعد الولادة والحمد لله الجنين في اتم صحه وحال .
هذه الروح البشريه كان من الممكن ان يتم اجهاضها بسهوله او تترك دون تتدخل لتموت فقط لغرور او كبر او عدم اعتراف عن عمد او غير عمد لاجراءات تجري داخل الرحم لحماية الاجنه .
سنوات بفضل الله وكرمه من العطاء في هذا المجال وفي تدخلات انقاذ الاجنه داخل الرحم فقمنا بعمل جراحات تقليديه للاجنه مثل فصل الدورة الدمويه للتوأم داخل الرحم وقمنا بعمل اول جراحه لمثانه الجنين لعلاج انسداد قناة مجري البول في الشرق الاوسط وافريقيا بعد استاذتي الافاضل في جامعة برشلونه ادوارد جراتكوس و مارتينز اول من قاموا بهذه العمليه عالميا وشرفت ان يكون هولاء الاستاذة الكبار عالميا من منحوني ماجيستير طب وجراحة الاجنه والحمل الحرج كأول مصري يحصل علي هذا الماجيستير الموثق والمعتمد من جامعة برشلونه وبمرتبة الشرف .
كما قمنا بعمل اول جراحه مفتوحه للجنين لعلاج الصلب المشقوق او فتق النخاع الشوكي للجنين داخل الرحم وتم تصوير العمليه كامله علي صحيفة الديلي ميل العالميه .
ارجو منكم دائما ان تأخذوا بأراء مختلفه وخصوصا في قرار الاجهاض مهما كان اجماع الاطباء علي شيء زي مثلا لما تلاقي واحدة تقولي الدكاتره قالولي ان ما فيش عينه بتتاخد من الجنين عشان نعمله تحليل وراثي الا في الشهر الرابع ( كذب والله كذب ) العينه بتتعمل في الاسبوع الحادي عشر يعني في اول الشهر التالت وبتتاخد من المشيمه . تقوم راجعلهم تاني يقوموا يقوللها اصلها خطر وبتسقط الجنين ( كذب والله كذب نسبة الاجهاض في اخذ العينه ١ في الاف من السائل الامنيوسي وفي المشيمة ٢ من الف ) وعلي مدار عمل الالاف من الحالات لم يحدث منها اي اجهاض .
ايه اللي ممكن حد يخسره لو قال للمريضه الاجراء ده فعلا بيتعمل بس انا مش بشتغله وممكن تروحي تسالي حد تاني غيري .
زي بردو واحده يبقي عندها شوية بطانه مهاجره قليله الي متوسطة الدرجه افضل حل ليها المنظار وتحمل طبيعي وده مش كلامي ده كلام الابحاث المبنيه علي الدليل يقوم يخليها تعمل حقن مجهري .
اتمني من الله ان تنشروا قصة ميرنا علي اكبر نطاق علها تكون سببا ان تمنع جنين ان يجهض وان تعطي الدافع للامهات وان تعطي وعيا مجتمعيا في عالمنا العربي .
