الغرفه الاولي:-
انت عارفه كويس انت عاوزه ايه ؟ ربنا نجاكي من سرطان الثدي وفكرة اننا نحمل تاني هتعرضنا لنسبة خطوره لرجوعه . احنا هانعمل كل حاجه عشان نتابع وقت الحمل ونتدخل لو في اَي خطوره بس لازم تعرفي اننا ها نشط التبويض والحمل في خطوره والحل التاني .
يادكتور اموت بس ابقي ام ومش هاشيل صدري عشان ابقي ست قدام جوزي .
سكوت وغصه ودموع احبسها كالعاده . هاعمل كل حاجه عشانك وربنا ييسر الحال .
الغرفه التانيه:-
ايه جماعه اللي انتوا فيه ده دوا ايه وبتاع ايه الست بترجع لما اتصفت وداخله علي انسداد معوي سرطان المبيض بقي ٣٠ سم انتوا مش شايفين بطنها كأنها حامل في تلت توائم .
جوزها حالف عليها يادكتور ما تعمل عمليه لانها كده كده هاتموت
يعني يا جماعه ها تسبوها كده تتعذب لحد ما تموت طب ما تعيش كويسه لو ربنا كاتبلها الموت وبعدين ما احنا كلنا كده ممكن نموت قبلها.
صمت وسكوت ولسان حالي ايه الهم ده
الغرفه التالته :-
للأسف يا مدام الجنين أطرافه أيديه ورجليه مشوهين
تمام يا دكتور يبقي لازم ينزل
بصي حضرتك انا بشتغل الشغلانه دي عشان اقف جنب الملك اللي بيخلص روح من روح مش عشان اقف جنب عزرائيل والموضوع مالوش اَي دعوه بدين انا مقتنع انه من اول يوم الجنين في روح مش في معاد معين لاني بشوف الحنين بيكبر قدام عيني حتي تحت الميكروسكوب . انا مقدرش ابقي مكانك ومش عارف لو مكانك هاعمل ايه .
الجنين ده ها يعذبنا طول عمرنا وهو ها يتعذب من الناس اللي حواليه ومن نظرات الشفقه والنَّاس اللي هتتعامل معاه غلط
تمام معاكي جدا نقوم نقتله بقي ؟؟؟ هو ده الحل ؟؟؟ الانسان ده ممكن جدا يبقي طريقك للجنه لحاجات كتير كويسه . انا دوري اني اكتشف اَي تشوه واني ابذل كل اللي اقدر عليه في علاجه داخل الرحم لو كان ليه علاج وفِي النهايه الشفا والإعمار بايد رب العالمين والله يكون في عونك .
سكوت ولسان حالي مرار
الغرفه الاولي:-
با ست الكل انت حملت في خمس اجنه وقبل ما تقولي اَي حاجه انا بحترم جدا كل الأطباء والدكتور اللي عمل لحضرتك حقن مجهري مهما كانت قامته وعلمه ممنوع تماما ومجرم في اَي مكان محترم في العالم اننا نحط ٦ اجنه لمريضه علي أساس تحمل وبعد كده ندخل نموت اربعه لان ها يحصل ذي اللي حصل لحضرتك وها تجهضي او كان ممكن يجيلك ولاده مبكره . ولو الطريقة دي صح كان العالم كله يحط ١١ عيل وبعدين نشوف هانموت مين .
كان نفسي يكملوا جوزي قالي دي اخر محاوله ليكي وارخصلي اتجوز عليكي الجواز مش ها يكلفني نص اللي دفعته عليكي
سكوت ولسان حالي يا مراري
الغرفه التانيه:-
بصي يا مدام طبقا للاشعات اللي شوفتها قبل ما تعملي العمليه ووضعك دلوقتي فا الدكتور. اللي عملك العمليه عملها كويس جدا والكيس للصغير ده بعد سنه من العمليه امر طبيعي ده لو حضرتك بتاخدي رأيي
انا مرحتش لدكتور الاو ما شكرليش في الدكتور اللي عمل العمليه خالص لحد مجالي احباط وبقيت خايفه جدا وفرحتي بالعملية راحت واكتئبت مع ان الوجع راح.
لاحول ولا قوة الا بالله بصي ياست الكل هاتي كده اَي مهنه وليكن نقاش سباك ميكانيكي مهندس مدير مبيعات رئيس مجلس اداره محامي اَي مهنه في العصر اللي احنا عايشين فيه ده . يا اما هايقولك مين الحمار النصاب اللي عملك الشغل ده او الورق ده او الخطه دي او الرسمه دي او السباكه دي ؟؟؟؟؟ يا اما هيقولك والله كان ممكن يعمل احسن او يستخدم حاجات احسن او كان ممكن يتعمل حاجه احسن او بسعر أرخص . يا اما ها يسكت ومش ها يعلق وده من رحم ربي.
مش هتلاقي الا قله قليله جدا جدا جدا جدا اللي هايقولك تسلم ايده وخصوصا لو ميعرفوش او ما يربطهمش صداقه ولا منفعه او خايف منه .وممكن يقولك هو ممكن يعمل ايه او بيشتغل ازاي .
فخلاصة القول يامدام انت فعلا كويسه ومش محتاجه اَي عمليات تاني
سكوت وصمت ولسان حالي عدينا منها علي خير يارب
الغرفه التالته:-
انا مش بنت يادكتور انا بقالي اربع ايّام بفكر في الانتحار مستنيه اقابلك
انت بنت وست الستات ومش معني ان تحليل الجينات طالع ان فيه جينات ذكور في جسمك تبقي راجل لان جينات الذكوره دي مش شغاله ولان الستات بتيجي باكتر من كذا شكل يعني ممكن ست يبقي عنده جينات الانوثه مضروبه في تلاته وفِي ناس بتبقي نص الجينات والباقي صفر . انا بنصحك انك انت اللي تبلغي خطيبك واهلك وكل اللي ها نعمله اننا لازم نشيل تكوينة الخصيتين ونعمل مهبل كامل عشان تعرفي تعيشي حياتك باْذن الله
اوعي تفكري في الانتحار انت شخصيه ناجحه وإنسانه بنت ناس وقدامك حاجات كتير تعمليها في حياتك
اخر العياده ونازل اركب العربيه
طبيبه متدربه جديده ؛ د وائل د وائل
نعم
انت ازاي عارف تعيش كده. انا من وانا في الكليه بتابعك وبشوفك دايما بتضحك .
اه عادي هاروح أحط شويه بوستات كوميديه لاني ماليش طول في النكد علي راي الاستاذ بيومي فؤاد
انت لسه ماشوفتيش حاجه اللي هاتشوفيه شعرك هايشيب منه وانوثتك هاتنتهي اهلًا بيكي في ارض
لواقع بعيد عن الكتب والأحلام الوردية . انا لو هاقعد افكر في كل الهم ده ممكن أتعالج نفسي تخيلي كده ده اللي بيتقال في وشنا امال لو كنّا بقي مباحث واو مخابرات وبنعرف ادق اسرار البشر وبيقولوا ايه علي بعض وبيشتموا بعض في ضهر بعض ازاي تخيلي حياتنا كانت تبقي ازاي
بصي انا هاحط كام بوست كوميدي كده وهاروح امسك مضرب التنس والعب لحد ما أقع من التعب وبعدها واتفرج علي فيديوهات فيدرر اللي كان نفسي ابقي زيه وده البني ادم الوحيد اللي كان نفسي ابقي زيه علي فكره وبعدين اتهد انام عشان اشوف اسبوع جديد من المرار.