البلوغ هو عبارة عن تغيرات وتطورات بتحصل فى جسم البنت عشان تنتقل من مرحلة الطفولة لمرحلة النضج فى المرحلة دى بيظهر عند البنت الثديين وبيحصل تطور لحد مايوصل لشكل الثدى الطبيعى كمان بتنزل الدورة الشهرية وبيكون متوسط عمر البلوغ عند البنات 11 سنة لكن مافيش داعى للقلق لو حصل البلوغ فى اى وقت من سن 8 ل 14سنة
ايه اول علامة من علامات البلوغ ؟
نمو الثديين هو اول علامة من علامات البلوغ بتظهر ومن الطبيعى فى فترة نمو الثديين يحصل وجع
ايه هى باقى علامات البلوغ
- نمو الثديين لحد مايوصل لشكل الثدى الطبيعى للسيدة البالغة
- بعد سنتين تقريبا من بداية ظهور علامات البلوغ هاتبدأ الدورة الشهرية
- شعر العانة بيبقى اتقل واكثر سمك ويبدأ شعر تحت الابطين فى الظهور كمان ممكن يظهر شعر فى اماكن تانية من الجسم
- زيادة كمية العرق ويبدأ حب الشباب فى الظهور كمان بتظهر الافرازات المهبلية الطبيعية
- كمان بيحصل طفرة فى النمو عند البنات فى الوقت ده يعنى بيزيد نموها فى الوقت ده من 5 ل 7.5سم فى السنة لحد ماتوصل للطول الطبيعى وبعد كدة يتوقف الطول
- زيادة الوزن فى بعض البنات وبيتغير شكل الجسم للوصول للشكل الانثوى
بتستمر علامات البلوغ فى الظهور والتطور لمدة 4 سنين وبعد كدة بتوصل الانثى للشكل النهائى للانثى البالغة وهو
- الثدي بيوصل للشكل والحجم الطبيعى للانثى البالغة
- بينتشر شعر العانة على الجانب الداخلى للفخذين
- الاعضاء التناسلية بتوصل لدرجة النضج فى الشكل والحجم
- بيتوقف زيادة الطول فى الانثى
التغيرات المزاجية اللى بتحصل فى سن البلوغ
فى اضطرابات مزاجية ونفسية بتحصل فى سن البلوغ لان بيكون صعب على الاطفال التكيف على التغيرات اللى بتحصل فى جسمهم كمان ظهور حب الشباب و رائحة العرق بتسبب الخجل فى السن ده
كمان بيحصل تطورات فى مشاعر الاطفال واحاسيسهم
وبسبب كدة ممكن تظهر مشاكل نفسية فى السن ده زى نقص الثقة بالنفس و العدوانية و الاكتئاب
التعامل مع التغيرات فى سن البلوغ
- التعامل مع تغير رائحة الجسم بسبب زيادة كمية العرق وده عن طريق الاهتمام بالنظافة الشخصية واستخدام مضادات التعرق مع الاهتمام بازالة الشعر باستمرار
- الاهتمام بنظافة الوجه والبشرة وغسله مرتين يوميا للسيطرة على حب الشباب اللى بيظهر فى الفترة دى وبيكون سبب حرج عند بعض البنات
- التعامل مع التغيرات فى شكل الجسم وزيادة النمو اللى بتحصل فى الوقت ده باختيار ملابس مناسبة عشان مايحصلش خجل من التغيرات دى والانتظام فى ممارسة الرياضة عشان زيادة الوزن اللى ممكن تحصل فى الفترة دى
- بيحصل تغيرات نفسيه بسبب التغير فى الهرمونات وتغير شكل الجسم عشان كدة مهم احتواء البنت فى الوقت ده والدعم النفسى واقناعها ان التغيرات اللى بتحصل هى تغيرات طبيعية فى الفترة دى
- كمان الكلام عن المشاعر المحسوسة فى الوقت ده مع شخص موثوق بيه بيساعد بطريقة كبيرة