كتير من البنات مش عارفين ايه الطبيعى وايه اللى مش طبيعى فى الم الدورة الشهرية وكتير بيروحوا للدكاترة خايفين وفاكرين ان فى مشكلة ولكن فى معظم الاحيان بيطلع الموضوع طبيعى
ايه هو الم الدورة الشهرية
هو الوجع اللى بتحس بيه معظم البنات فى اليوم الاول والتانى من نزول دم الدورة الشهريةوبتختلف شدة ودرجة الشعور بالوجع من بنت للتانية فى بنات بيكون الوجع عندهم بسيط ومحتمل وفى بنات الوجع بيزيد جدا لدرجة انهم مش بيعرفوا يمارسوا حياتهم الطبيعية فى الايام دى واوقات بيكون فى اعراض تانية مع الوجع ده زى الدوخة او الترجيع او الاسهال
امتى يبقى وجع الدورة طبيعى ومافيش منه قلق ؟
فى نوعين من انواع الوجع ( اولى و ثانوى )
الوجع الاولى ده هو الوجع الطبيعى اللى مافيش منه اى قلق لانه بيحصل نتيجة حاجة طبيعية وهى انقباضات الرحم وده بيكون شدته فى اليوم الاول من نزول الدم وبعد كدة شدة الوجع بتقل بالتدريج لحد ماينتهى نزول الدم بيروح الوجع خالص
الوجع الثانوى النوع ده من الوجع بيحصل لما بيبقى فى مشكلة او مرض زى مثلا بطانة الرحم المهاجرة او الاورام الليفية او تضخم عضلات الرحم او اى مشكلة فى الرحم او الانابيب وبتكون طبيعته مختلفة عن النوع الطبيعى يعنى الوجع غالبا بيبدأ قبل مالدم ينزل و تفضل تزيد شدة الوجع ده مع نزول الدم والشدة مش بتقل خالص وكمان الوجع مش بينتهى بعد مالدم يقف وتخلص الدورة الشهرية
لو كان الوجع اللى عندك من النوع الاولى ده مافيش منه مشكلة و هانتكلم ازاى تتعاملى معاه وتقلليه
لكن لو كان الوجع من النوع الثانوى لازم نزور الدكتور لكى يتم التشخيص لو فى مشكلة عن طريق عمل السونار وممكن يوصل الامر انه يتم تشخيص المشكلة عن طريق المنظار
ازاى اتعامل مع الوجع الطبيعى للدورة الشهرية
ممارسة الرياضة بصورة منتظمة خلال حياتك هاتساعدك على تقليل الالم الى هاتحسى بيه وقت الدورة زى مثلا الايروبكس او السباحة او ركوب العجل
الكمادات الدافية على البطن هاتريحك بنسبة كبيرة وقت الالم
النوم والاسترخاء لساعات كافية اثناء الدورة الشهرية هايقلل شعورك بالالم
فى مسكنات ممكن نستخدمها اثناء الوجع زى البارسيتامول او البروفين