فى الطبيعى بتتحرك البويضة المخصبة فى إتجاه الرحم ولكن في بعض الأوقات ممكن تقف في قناة فالوب ويكبر الجنين فى المكان ده .
فبيحصل حمل خارج الرحم على الأنبوبة.كمان ممكن تقف البويضة المخصبة في مكان تانى،زى مثلا المبيض أو عنق الرحم. لما بتقف البويضة المخصبة فى مكان برة الرحم مش بيكتمل نمو الجنين بالشكل الصحيح ليه وكمان بيكون فى خطر على حياة الام لأن نمو جنين فى مكان غير المخصص ليه ممكن يسبب انفجار المكان ده ويحصل نزيف داخلى علشان كدة الحمل خارج الرحم من الحالات الطارئة اللى لازم يتدخل فيها الدكتور بسرعة سواء بالادوية او الجراحة.
أسباب الحمل خارج الرحم:
- إصابة قناة فالوب بأى ضرر نتيجة العدوى أو أى جراحة سابقة فى البطن .
- كمان بتزيد احتمالية تكرار حدوث الحمل خارج الرحم لو حصل حمل خارج الرحم قبل كدة .
- التهابات بالحوض،البطانة المهاجرة للرحم،التدخين أوالحقن المجهرى
- وجود لولب أو حبوب منع الحمل التى تحتوى على هرمون البروجيسترون فقط
الأعراض:
غالبا بيحصل تأخير للدورة الشهرية عن معادها وبتحسى اعراض زى مثلا
- ألم شديد أسفل البطن وغالبا الوجع ده هيكون على ناحية واحدة .
- نزيف مهبلي او افرازات بنية.
- ألم في كتفك.
- الشعور بالدوخة أو الإغماء.
لو حسيتى أى حاجة من الأعراض دى لازم تروحى للدكتور بسرعة وفى بعض الأوقات ممكن ماتظهرش أى أعراض .
والتشخيص بيكون مابين الأسبوع السادس والعاشر من الحمل عن طريق قياس متكرر لهرمون الحمل الرقمى كل 48 ساعة واللى يبزيد فى نسبته لكن بمعدل أقل من الحمل الطبيعى وسونار مهبلى للتأكد من عدم وجود كيس حمل داخل الرحم أو عمل منظار البطن. وممكن يختلط التشخيص مع مرض القولون العصبى أو التسمم الغذائى أو التهاب الزائدة الدودية.
ويختلف العلاج على حسب حالة المريضة
ممكن العلاج يكون بس بمتابعة المريضة بهرمون الحمل الرقمى والسونار أو علاج دوائى أو عمل منظار البطن وممكن يوصل العلاج لإستئصال الأنبوبة فى حالة انفجارها.
هل ممكن يحصل الحمل الطبيعي بعد الحمل خارج الرحم؟
ماتقلقيش لو حصلك حمل خارج الرحم قبل كدة لأن معظم السيدات اللى واجهوا المشكلة دى حصلهم بعد كدة حمل طبيعى حتى لو تم إستئصال الأنبوبة ممكن بردو يحصل الحمل الطبيعى من خلال الانبوبة التانية .
بعد الحمل خارج الرحم ، يتراوح احتمال الحمل مجدداً بشكل طبيعي ما بين 80% – 88%، بينما يكون احتمال حدوث حمل خارج الرحم تانى ما بين 4.2% – %5