من واقع قصص الحياه .. استوقفني مرة مريضه في العيادة وهي بتحكيلي علي التاريخ المرضي ليها انها حملت في جنين يدعي الاننسيفلي او الجنين الفاقد لعظام الجمجمه. انها ذهبت لأكثر من طبيب و قالوا لها لا تقلقي و لن يتكرر ذلك .. فسألتها انتى ما كنتيش بتاخذي حمض الفوليك قبل الحمل .. قالتلي لا … قولتلها طب خدتي في الحمل ده .. قالتلي ما حدش قالي حتي اما سألتها .. طب انتى ما سألتيش الدكاتره .. قالتلي والله سألت يا دكتور و قالولي مش محتاجه و انتى كويسه و الموضوع مش ها يتكرر ده نادر جدا ..
قسما بالله أنا ما بصدقش حد وببقي عارف ان كل الناس بتتجني علي بعضها وكل واحد بيحب يرمي مسؤليته علي التاني فا عادة ما بصدقش اي كلام …
لكن الست فعليا صادقة تماما .. وللاسف الحمل التاني برده حصل فيه نفس التشوه ….
اسمعي كويس وافهمي كويس اللي يقولك خدي حمض الفوليك اما تبقي تحملي .. أنا اسف انسان عديم العلم والطب … حمض الفوليك بيتاخد من قبل الحمل لان المخ بيتكون من اول شهر اللي هو أصلا عقبال ما بتعرفي انك حامل بيكون أصلا تكوينة المخ حصلت ..
دي اهم نصيحه ممكن انصح بيها اي عروسه جديدة ان قبل الجواز لازم تاخدي حمض الفوليك ..
اما بالنسبه للستات اللي عندها السكر او تاريخ وراثي للاجنه المشوهه او اللي بتاخد أدوية مناعة معينه مع الحمل او أدوية صرع او نفسيه او تعاني من السمنه .. حمض الفوليك لازم يتاخد بجرعات مضاعفه ..
اما يتكرر تشوه الاجنه مرتين انتى مش محتاجه سيدنا جبريل ينزل من السما يفهمك انك لازم تبدأي تتحركي ونعرف السبب الجيني المسبب.
الخلاصه خلي حمض الفوليك صديقك طول الفتره اللي مخططه فيها للحمل . و انشري الوعي في المجتمع زي ما بتنشروا الكوميكس 
. لعل وعسي تفيدوا الناس .
. لعل وعسي تفيدوا الناس .