يا اخي المتعه في صوره والله بفضل الله
فشل متكرر في نجاح الحقن المجهري . ألم في الحوض . تنقيط دموي مستمر . غزارة دم الدوره و طول فترتها . تأخر حمل بعد الولادة القيصرية السابقه . افرازات مهبليه متكرره .
دي اعراض كلها سببها وجود فتق في جرح القيصريه السابق و الحقيقه دي حاجه بتعدي علي ناس كتير قوي واطباء من العالم اجمع لهم قيمتهم . واحيانا بيوصفوا الفتق ويفسروه علي انه تغيرات طبيعيه بعد الولادة وده ليس صحيح .
اهتمت الجمعيات الدوليه بهذا الامر و اصدرت له ورقه بحثيه لدراسة اثر هذا الفتق وو ضعت اقتراحات مختلفه للعلاج .
بمنتهي السهوله و الوضوح للاعمي او من كان قلبه اعمي ولا يريد ان يري . ( شايف المثلث الاسود اللي في الصوره اللي فوق ؟؟؟)
ده الفتق يا سيدي و لازم يتشاف بسونار واضح متقدم و الفتق ده اسود عشان مجمع سائل و مكمل في تجويف الرحم كا خط اسود سميك واضح .
معناه ان الست دي ها تقعد تنقط افرازات و دم و لوحطيت جنين في الوضع ده مش ها تثبت الاجنه ولو حاولت تحمل طبيعي الجنين مش ها يثبت .
بص كده علي حلاوة وجمال الصوره التانيه . خط ابيض جميل للبطانه الرحميه . بعد عمل منظار بطن ورحم ٣ ساعات من ترميم المنطقه و تحديد مكان الفتق وتسليك المثانه و ازالة الجزء الضعيف من الجرح اللي ممكن كانت تتكون عليه مشيمه ملتصقه و تؤدي الي التغلغل من خلال الجرح الي الحوض والي المثانه . ثم بعد ذلك خياطة الجرح بالمنظار و منها التأكد بالمنظار الرحمي علي عودة التجويف سليم ومعافي تماما بفضل الله .
طب يا دكتور هل ده معناه ان في خطأ في العمليه القيصريه ؟
لا طبعا وارد اي قيصريه يحصل فيها كده حتي لو كانت في امريكا او اوروبا و شوفنا حالات بالمئات ولدت في امريكا واوروبا وحصل نفس الموضوع بترجع لعوامل مختلفة كتير يطول شرحها
طب يا دكتور كل حالات فتق القيصريه تحتاج جراحه ؟؟؟
لا طبعا حالات قليله اللي تحتاج جراحه الباقي بتبقي متابعه فقط مع بعض الادويه . و افضل في بعض الحالات ان تكون الجراحه بمنظار الرحم ولكن الاغلب بمنظار البطن و النتائج بعد منظار البطن رائعه وواضحه تماما .
عاوز تشوف الموضوع خطوة بخطوه بص علي اللينكات في الكومنتات وشوف صوت وصوره الاجراءات . كا عادتنا بالصوت والصوره والدليل خطوة بخطوه من داخل غرف العمليات ومن واقع الحياه نقص عليكم علها تكون عظه وافادة .
