من كام اسبوع لو نزلتوا للبوستات هاتلاقوا ان نزلت فيديو لبيبي في سونار رباعي الأبعاد .
وسالت سوأل تحت حد خد باله من حاجه ؟؟؟؟
المهم يعني عاوز تقول ايه خلصنا .
عاوز اقول ان كتير من الأمهات والأسر بتفرح بصورة السونار الرباعي الأبعاد وبالفعل مافيش حاجه اسمها سونار رباعي الأبعاد بيشخص التشوهات ( انا عارف ان الكلام ده صدمه لكتير من الناس ) لكن والله اقسم بالله دي الحقيقه . مَش معني انك شوفتي البيبي علي السونار الرباعي الأبعاد يبقي البيبي كده كويس .
يعني مثلا الام دي عملت سونار رباعي الأبعاد ٣ مرات في مكانين مختلفين . ومحدش حد باله من مشكلة البيبي ده ( وده امر وارد جدا علي فكره ) البيبي ده الفك السفلي ليه ضامر والنوع ده بيبقي عنده اولا صعوبه في ابتلاع السائل الامنيوسي داخل الرحم وده بيخلي الميه اللي حواليه تبقي كتير وجيب الميه بيتخرم ويحصل اجهاض . ثانيا بعد الولادة مَش بيعرف يتنفس كويس ولو الأهل مَش عارفين كده وتتولد في مستشفي مَش مجهزه البيبي ها يتوفي وقت الولادة . ثالثًا النوع ده من الاجنه بيبقي في منهم عندهم تشوهات بالمخ وبيكتشفوها بعد الولادة بسنين في حين انها ممكن تكتشف من بدري . ده غير انه مَش بيعرف يرضع وبيحتاج مجموعه من العمليات عشان يعرف يبلع .
طب نعمل ايه يا دكتور ؟؟؟
الموضوع لازم يبقي في سونار من الجيل المتقدم درجة نقاءوه وجودة صورته تبقي عاليه جدا ومافيش تشوه الا لما بيتشخص علي السونار الثنائي الأبعاد بل بالعكس السونار الثنائي الأبعاد هو الأساس في العالم اجمع والأفضل في تشخيص التشوهات .
اللي يعرفني يعرف اد ايه بقعد مع كل حامل عشان نصور المخ كامل والقلب وبنمسك جزء جزء نفحصه . ده غير تحليل دلالات التشوه اللي هيه شيء أساسي جدا لأي ست في العالم في اَي دولة في الدنيا اللي خلقها ربنا . تحليلات دلالات التشوه دي مهمه جدا وأنها تتحط علي سوفت وير محترم وبرامج تتبع . تخيلوا يا مؤمنين ان في بعض الاطباء عايشين ما بينا بيقولوا للحوامل متكلفيش نفسك دي تحاليل ملهاش لازمه وفزلكه عا الفاضي وصرف فلوس. عدد مهول من الحوامل في مصر محدش فيهم بيعمل التحاليل دي ولو اتعملت مابتتحطش مع المعادلات الاساسيه لمقاسات الجنين .
تاني المطلوب هو سونار متقدم محترم والسونارات اسعارها بتتراوح بين تمن غساله الي تمن عربيه بي ام دابليو
ثانيا مسح كامل للجنين مَش سونار خمس دقائق
ثالثًا تحاليل دلالات التشوه في اول الحمل ضروري جدا مع ترجمتها ترجمه محترمه علي مقاسات الجنين .
رابعًا : السونارات والتكنولوجيا وجراحات الاجنه بمدي ما وصلت اليه من تقدم لازالت عاجزه عن اكتشاف كافة التشوهات الجنينيه وعلاجها جميعا .
اللهم فرح كل ام بجنينها وأسترها مع الجميع . 
