الحقيقه ان كمية الاسئله والاستفسارات اللي جاتلي وخصوصا اليومين اللي فاتوا دول عن ان عندي قطه وانا حامل او بفكر احمل وناس قالتلي لازم أتخلص منها كانت كتيره جدا وغريبه في نفس الوقت وفي منها كلام انا مش قادر استوعبه بصراحه .
وعشان منتكلمش كتير وندخل في تفاصيل معقده الحيوانات كلها بما فيها الخرفان والماشيه والخفافيش والطيور و الخنازير وحتي القوارض والحشرات كلهم بتعيش فيهم بكتريا وطفيليات ممكن تضر الانسان عموما والمرأه الحامل والجنين ولو فتحنالها مجال مش هيكفينا الف صفحه .
بالنسبة لمرض التكسوبلازما بقي مش بس القطط اللي بتنقله ده ممكن الكلاب كمان . وده بيبقي في براز القطط . بمعني ان ايديك او الاكل اللي بتاكليه لو اتلوث بالبراز ده ممكن يتنقل المرض للجسم ذي أمراض كتير جدا .
نسبة كبيره جدا مننا كلنا عندنا المرض ده واكتسبنا منه مناعه خصوصا من ياكلون اللحمه النصف مطبوخه او اللحمه النيه او الكبهً النيه( اهل لبنان ) وعن طريق الخضار الغير مغسول جيدا . بمعني ان الموضوع مش موضوع قطط .
طبعا مش لازم تغيري مكان براز القطه وانت حامل وطبعا دكاترة الطب البيطري المحترمين يقدروا بسهوله جدا التعرف علي القطة المصابه واعطائها مضاد حيوي بسيط ( كلينداميسين او في بعض الأحيان فانكوميسين ) وبكده قطتك تبقي سليمه .
وحضرتك قبل الجواز يفضل تعملي التحليل دي لو عندك قطه او معندكيش عشان تطمني علي نفسك وبتاخدي علاج بسيط جدا حتي لو مصابه .
نسبة انتقال المرض اللي الجنين ضئيلة جدا وحتي لو انتقل في الدم فالنسبة الاطفال المصابه بيه بتبقي بردو ضئيلة جدا وبنشخصها بطرق مختلفه منها سحب السائل الامنيوسي وعمل سونارات واحيانا رنين مغناطيسي علي مخ الجنين اثناء الحمل وبندي مضادات حيويه معينه علي حسب فترة الحمل .
عموما القطط بتحسن الحاله المزاجية عند الفتاه اللي اتعودت تبقي مسؤوله عن روح وكمان بتعودها انها ازاي ترعي روح .
الموضوع وببساطه اطمني علي قطتك عند طبيب بيطري . اعملي فحوصات صح قبل التفكير في الحمل . اغسلي ايديك كويس قبل الاكل . متاكليش لحمه نص سوي او لحوم مصنعه . بلاش تحتكي ببراز القطط المصابه وانت حامل او البسي جوانتي قوي واغسلي ايديك كويس بعدها.
واتبسطي ياستي انت وقطتك